هویت و دموکراسی
مقالات و موضوعات خودمهویت و دموکراسی
مقالات و موضوعات خودم
سه‌رۆک وه‌زیران و ناهه‌قییه‌یلێ وه‌ل کوردستان
کابینه‌ى ئیجاره‌گ وه سه‌رۆک وه‌زیرى نورى مالکى پێکیا و دێرێد ته‌مام دوو، وه ته‌مامى مه‌دیون کاک مه‌سعود بارزانى سه‌رۆک هه‌رێم کورستانه‌وئه‌ى رێبه‌ر کورده وه وریایى خاسێگه‌و نوا له قه‌یران گه‌ورایگ له عێراق گرت.
هویچ لایه‌نێگ سیاسى ئه‌گه‌ر سه‌رۆک هه‌رێم نه‌ویاتاد قه‌بول نه‌کردله کابینه به‌شدارى بکه‌ن. وه هه‌ر جوورێگ بوى، حکوومه‌ت پێکهات. دویاى ئه‌وه‌یش دیمن جه‌ناب سه‌رۆک وه‌زیران چوین جوواو خاسییه‌یل سه‌رۆک ومه‌ردم کوردستان دا!. له‌ى کابینه‌ی ده‌وڵه‌ت عێراقه ک چشتێ وه ته‌مامبوین ماوه‌ى قانوونى نه‌منیه‌و ئه‌ڵوژاننیش نزیکه، وه‌لى دیمن ک ده‌وڵه‌ت مه‌رکه‌زى ک وه ده‌وڵه‌ت قه‌یران ناو ده‌رکردیه، هه‌ر رووژ و هه‌ر مانگ وهه‌ر ساڵ وه جوورێگ له جى ده‌سخوه‌شى، ده‌س برده‌و قوڕگ کورد و تواێد بتاسنێده‌ێ!. یه‌ى رووژ فه‌رمانده‌یى ئۆپراسیۆنه‌یل دجله دروس ئه‌کاو رووژ تریش هه‌ق ده‌س کۆمپانیه‌یل نه‌فتى ک له هه‌رێم کار که‌ن نیه‌ید و رووژتریش له‌شکه‌رکیشى وه‌ره‌و هه‌مرین و که‌رکوک و سنووره‌یلێ ک ها ده‌س قاره‌مانه‌یل پێشمه‌رگه‌ى کورد که‌ێده ئامانج. بوودجه‌ى وه‌زاره‌ت پێشمه‌رگه نیه‌ید، له هاڵێگ پاسه‌وانه‌یل ناوچه‌ى سه‌ونز ک مالکى وده‌وڵه‌تداره‌یل عێراق له ناوێ ته‌که‌و دانه‌و هانه ئامان خودا، پێشمه‌رگه‌ى کورد مقه‌یه‌تی له‌لێ که‌ن.
ئه‌ى دویایشه، جه‌ناب سه‌رۆک وه‌زیران، بوودجه‌ى حکوومه‌ت هه‌رێم وته‌نانه‌تیش مووچه‌ی مانگانه‌ى کارمه‌نده‌یل حکوومه‌ت هه‌رێم بڕێدو نوا له‌لێ گرێد.له لاى تریشه‌و دوینمن ک جه‌ناب موقته‌دا سه‌در ک رێبه‌رێگ رووحییه‌و لایه‌نگره‌یل فره‌یگ له شار به‌غداو ئه‌و دویاى شاره‌یل باشوورعێراق دێرێد، پاشه‌کشه له‌پرۆسه‌ی سیاسی که‌ێد و وه ناوه‌یل جیاوه‌جیا مالکى چڕێد و لاناوه‌یلێ ئه‌را ئه‌ى هاوپه‌یمانیه بڕێد!. ده‌وڵه‌ت ئێرنگه‌ى عێراق تویش قه‌یران گه‌وراێگ بویه، ئه‌وه‌یشه هه‌ڵه‌وگه‌ردێ وه ته‌ک بڕیاردان و گووش نه‌ته‌کانن له هویر وئه‌راچینه‌یل لایه‌نه‌یل تر ک خوه‌ى وه قه‌وى زانین هاوپه‌یمانی ده‌وڵه‌ت یاساو سه‌رۆکه‌گه‌ى په‌یوه‌ندى راسه‌ى راس دێرێد. ئه‌وه‌گ دیاره یه‌سه ک ئه‌ىده‌وڵه‌ته، سه‌روه‌خوه‌ى نییه‌و پیلانه‌یل وڵاته‌یل تره‌ک جیوه‌جێ که‌ێد(قه‌رار نییه خوو هه‌رچشت بویشیه‌ید، مانگ وه چه‌و دیاره وه کلگ ئه‌راى ئشاره که‌ن).جه‌ڕمه‌جه‌ته‌یل هویر مه‌زه‌وى کیشایه‌سه ئه‌و جییه ک ئێرنگه دوینیمن، ناوچه‌یلێگ جوور سلێمان به‌گ و فه‌لوجه که‌فتیه‌سه ده‌س گرووپ داعش. نه‌بایه‌د له‌یره وه ئاسانى له لوى و لاى ئیچنه چشتێ ره‌ێ بویمن.چوینکه هاتن ئه‌ى گرووپه، له ئه‌نجام کیشمه‌کیشه‌یل ده‌وڵه‌ت عێراق وه‌ل لایه‌نه‌یل سیاسى وه دسهاتیه ک فێشتریان سوننین و ئه‌ى گرووپیشه یه وه‌ده‌رفه‌تێ ئه‌را خوه‌ى زانیه. ئێرنگه جى دێرێد ئیمه‌ى کورد له خوه‌مان بپرسیمن: ده‌وڵه‌ت عێراق تازه‌چوود هه‌رجووره چه‌ک و ته‌قه‌مه‌نى ئه‌را هێزه‌یل چه‌کدار خوه‌ێ سێنێد، وه‌لى گه‌ى وه ئیمه ره‌سێد، له‌لێ بێبه‌ش کریه‌یمن. تا ئه‌ى ساته ده‌وڵه‌ت به‌غدا، چه‌ک ک هویچ، ته‌نانه‌ت مووچه‌ی مانگانه وه پێشمه‌رگه‌یل نه‌یاس ک به‌ش فره‌ێگ له خاک عێراق ها له وه‌رسه‌یان و جوور چه‌وخوه‌یان پارێزنه‌ى. ئمجا له‌یره عه‌قڵیه‌ت تریش هه‌س، ئه‌وه‌یشه یه‌سه ک نیه‌توان کورد له‌باوه‌ت ئابوورییه‌و سه‌روه‌خوه‌ێ بوود. ئمجا وه‌ل ده‌رهاتن نه‌فت له‌کوردستان، هه‌ر هانه ده‌نویک وه‌شانن و هه‌ر رووژ وه ده‌سپێچگێ وه‌لمانا ده‌س وه یه‌قه بوون. ئایا جى وه نه‌ێرێد له‌یره له لاى خوه‌مان هویرله یه بکه‌یمه‌و ک جیاوازى له ناوه‌ین ئه‌ى حکوومه‌ته وه‌ل حکووومه‌ته‌یل تر عێراق چه‌س!. ئایا ئه‌و هه‌مگه زامه‌ته ک سه‌رکرده‌یل کورد ئه‌را یه‌که‌وگرتن عه‌ره‌وه‌یل کیشانه ک گووش وه شیعه‌و سوننى نیانه ئیچنه جواوه‌و دریه‌ێد. ئایا هه‌میشه بایه‌د کورد بکه‌فێده وه‌ر پووز و خاسیه‌یلێ له هویره‌و بچوود ک ئه‌را برایل عه‌ره‌و خوه‌ێ کردێه!. ئه‌راکورد میه‌نتکیش ئه‌وه‌گ دیاره یه‌سه: هه‌ر که‌س له برایل عه‌ره‌ومان نیشتیه‌سه‌و ته‌خت هه‌ر له هویر ئه‌وه بویه بچه‌وسنێده‌مانه‌و و نه‌یلێده‌مان وچانێ بیه‌یم و هه‌ناسێگ بکیشیم. ئێرنگه هه‌ر‌که‌س یا لایه‌ن تر بویاتادو ئیجووره چشتێ و سه‌رێ باتاد، چرێ تر گرته‌و وه‌ر...!؟. ئایا هه‌میشه جوواو خاسى و نه‌یشتن له یه‌ک ترازانێ ک کورد گرته‌و وه‌ر، جوواوێ یه‌سه ک وه سه‌رێ تیه‌رن؟