وه‌ل حاسڵ کار ماڵ ئه‌را گوزران ژیان خوه‌ێان به‌شه‌و کردوین. سالێ له سالاَن وه‌رو گه‌رمه‌سێر نه‌چێن و مه‌ننه زمگه له ئێلاَخ. زمسان وه‌فر فه‌ره‌ێ وارێ له کویه‌سان، که‌س دى له ده‌یشت ده‌ر نیه‌مینێ. یه‌ى شه‌وه‌کێان گه‌وراێ ماڵ ک باوگێان بوى له خه‌و ئه‌ڵسا توواس بچوودن ده‌س نماز بگرێ و باێدن نماز بخوه‌نێ، له ده‌ر ماڵ ک هاته‌و ده‌یشت بچووت ئه‌را لووى ئاو دى شوون پاێ هاتێه تا ده‌ر ماڵه‌ى َو ئه‌ڵـگه‌ردیاسه‌و. ئه‌لاَجه‌ویى هات له لاێ خوه‌ێ وه‌ت چما ئه‌ێ که‌سه وه‌ێ وه‌فره‌و سه‌قامه، هاتیه ئه‌را ده‌ر ماڵ م ئه‌را نه‌ێایه له ده‌ره‌گه‌و ناتیه‌سه‌و ناو و ئه‌ڵـگه‌ردیاسه‌و چێیه‌سه‌و!. که‌فته رێاو شوون پاێ ئه‌ڵـگرت وه‌ت باێه بزانم ئه‌ێ رێواره کیه؟ چێ چێ تا دى شوون پاگه چێیه‌سه‌و ناو ئه‌شکه‌فتێ. چێیه‌و ناو ئه‌شکه‌فته‌گه‌و دى له ناو ئه‌ێ ئه‌شکه‌فته ئاگرێ کریاسه‌و له لووى ئاگره‌گه پیره‌مه‌ردێ سفـێ پووش نیشتگه. سه‌لاَمێ دا پێ، پیره‌مه‌ردیش سه‌لاَمێ سه‌ن و وته پێ به‌و بنیش. پێایش نیشته لاێ. له لێ پرسى: قویخا ت تا ده‌ر ماڵ م هاتیده‌و وه‌ێ سووزو سه‌رماو سه‌قامه ئه‌را نه‌ێاد له ده‌ره‌گه‌و ناتیده‌سه‌و ناو؟ پیره‌مه‌ردیش وه‌ت: براگه‌م ت م نیه‌ناسى، م نێاز وه ده‌ر کوتانن نه‌ێرم خووه‌م بێ سه‌لاَ چمه هه‌ر ماڵێگه‌و ئه‌و ماڵه خه‌راو وخاپیر بوودن. م نهات ناومه، راسه‌گه‌ى بتواید توواسم بامه‌و ناو ماڵده‌و وه‌لێ وه‌ختیگ م تواسم بامه‌و ناو ماڵه‌د، ت وه‌ل گوڵ بانگ شه‌فه‌قا له خه‌وا هاتى و روى کردیه خوداو ده‌س نماز گرتید. ئه‌را یه دى شه‌رم کردم و ناتمه‌و ناو. ئینگه ک خوه‌ت هاتیه له شوونم، م وه پاس ئحترام یه ک له شوونم هاتیه یه‌کم جار تواسم هه‌مو(گشت) چێشتت بووه‌م وه‌لێ ئیسه وه‌ى خاتره ک وه‌تم فورسه‌تێ ده‌مه پیدو له‌ته‌واو سه‌روه‌ت و سامان ک دیرید فه‌قه‌ت یه چێشت ئه‌رات هیلم. دو رووژیش وه‌خت ده‌مه‌پید خاس هویر بکه‌یدو وه بچید وه‌ل ماڵ و مناڵه‌یدا مه‌شووه‌رت بکه‌یدن، خوه‌دان ئه‌ڵوژنن چه رادان بیلم فه‌قه‌ت و فه‌راقه‌ت یه چێشت تویه‌نین ئه‌ڵوژنین ئینگه بچوو ئه‌را ماڵ و خاس وه‌ل ماڵ و مناڵدا مه‌شووره‌ت بکه. پێایش له ناو ئه‌شکه‌فت هاته‌و ده‌یشت و که‌فته رێا وه‌ره‌و ماڵ هات. ره‌سیه ماڵ گێشتێ ژن و مناڵه‌یل له کوڕو له دوَیه‌ت تا وه‌ویه‌یلێ خوه‌ێ کووه کرد، وه‌ت بان بنیشن کار وه پیدان دێرم. ئه‌وانیش هاتن نیشتن. گه‌ورا ماڵ هاڵ و حه‌کایه‌ت ئه‌راێان گه‌پ داو وه‌ت: ئینگه خوه‌دان له ئه‌ێ سه‌روه‌ت و سامانه یه‌کیگێان ئه‌ڵوه‌ژنن. گه‌پ دان ده‌س پێ کرد، ئه‌وه‌گ شووانى و وه‌ل په‌سه‌یلا بوى و سه‌ره‌وه‌رێ په‌سه‌گان کرد وه‌ت: باوگه بویشه پێ په‌سه‌گان نه‌وه‌ێد. کوَرێ گاوان وه‌ت: باوگه بویشه پێ گاێله‌گه نه‌وه‌ێد. ئه‌و کوَره‌ێ ک ره‌وکووانوى وه‌ت: باوگه بویش چاره‌واگان نه‌وه‌ێد. داڵـگێان وه‌ت: بویشه پێ شه‌ڕێ له گیان خوه‌مان بخێده لاو خوه‌مان نه‌کوشێ. یه‌ک تر له کوَره‌یلێ ک کارێ وه‌رزیرى و کشتوَکاڵ کرد وه‌ت: باوگه بویشه پێ وشکه ساڵى نارێده ملمانا. وه کوتاێ که‌لام هه‌ر کامێان چێشتێ وه‌تن. ژن کوڕه بویچگڵه ک له هه‌ساو وه‌وى(ئه‌روس) بویچگێه، ده‌م چه‌کان و وه‌ت ئه‌گه ئجازه به‌ین منى چێشتێ بویشم. باوگ ماڵ(خه‌سویره‌ێ نێر) وه‌ت: رووڵه تنیش هه‌رچى تواید بویش نیه‌تواێد سه‌لاَ له م بگرى گووشمان ها لاد. وه‌وى بویچگ وه‌ت: مه‌موو بویشه پێ هه‌ر چ تواێد بوه‌ێدن، بوه‌ێد فه‌قه‌ت ئه‌قڵ و هووش له که‌پووڵمان نه‌وه‌ێد. گه‌وراێ ماڵ مقێه‌و برد که‌مێ له سه‌ر ئێ قسیه فکره‌و کرد، وه‌ت: وه به‌ختم قسیه‌گه‌ت قسیه‌ى فه‌ره خاسێگه‌و ماناى گه‌وراێ دێرێد رووڵه له قه‌دیما وه‌تنه ماڵ له ده‌ور ئه‌قڵ جه‌م بووت. م دى ئینگه زانم چه بویشمه کاکه نه‌هات. هێمان وه‌خت فه‌ره‌ێ له مه‌وقه‌ێ ک کاکه نهات ئه‌راێ ناوى مه‌نوى وه‌لێ ئه‌وى دى قه‌رار خوه‌ى داو چێ ئه‌را لاى کاکه نه‌هات. وه‌ت کاکه نه‌هات ئیمه قه‌رارو شه‌ور خوه‌مان به‌سیمنه یه‌سه هاتمه‌سه خزمه‌تت. کاکه‌نه‌هات وه‌ت: هێمان وه‌خت دیرید بچوو خاس فکره‌و بکه دویاخر په‌شیمانى سوودێ نه‌یرێ. پیایش وه‌ت ئه‌را ئیمه دى فه‌رق نیکه‌یدن، ئیمه قسیه‌و شه‌ور خوه‌مان کردیمه‌و هاتمه‌س ئه‌را لاد. کاکه نه‌هات وه‌ت ئینگه له‌ێواسه فه‌رماێش بکه. پیا وه‌ت: نه‌هات هه‌ر چێ به‌ید له سه‌روه‌ت و سامان تا گیان مناڵیله‌گه‌م بووه فه‌قه‌ت ئه‌قڵ و هووش له سه‌رم نه‌وه. کاکه نه‌هات وه‌ل ژنه‌فتن ئێ قسیه‌یا که‌مێ وه‌ساو ده‌س کرده قسیه کردن. وه‌ت: برا بچوو به‌خشیمه‌ده ئه‌و که‌س ک یه ئه‌رات وه‌تیه دى هویچت نیه‌وه‌م هایده ئه‌مان خوداو ئه‌و که‌س ک رانمایت کرد. ئمجا له مه‌سه‌ل هاوردنه:(هه‌گ هات هه‌ى هه‌ى مه‌که هه‌گ نات وه‌ى وه‌ى نه‌که).